🇭🇰
生於斯長於斯（2）
這是我和香港的愛情故事。
一個好唔浪漫的故事。
曾經我同佢相互愛戀，當時佢一心一意對我好，我哋一齊嘅時光只有幸福。後來我哋之間多出一個第三者，因為我愛佢，所以選擇原諒。慢慢地，我發現第三者唔只一個，而係一個接一個，我唔可以繼續忍，於是開口講感受。佢扮聽咗，但根本無放係心上。
我哋之間嘅距離越來越遠，遠到連我都唔知道依家嘅自己愛嘅係邊個，但心理學家榮格話，每個人嘅潛意識都有一個或多個心目中愛人嘅形象。而我始終相信，香港就係我嘅最愛，永恆不變。於是我揀左不斷被佢肉體以至心靈傷害。
我住係第三者最早出現亦係最多嘅地區，飽受依群恐怖分子每日拖奶粉益力多來來往往嘅侵害，我忍；我住嘅屋邨，超過一半住客係欺騙香港感情嘅第三者，甚至出現簡體字宣傳、普通話廣播，但投訴無門，我忍；我同身邊嘅朋友面對一世人無得擁有自己嘅樓，頻撲一生都無瓦遮頭（又話中國人最重視根？我地果條呢？係咪係劏房呢？），或者供樓供到90歲都未斷供（可以留比你個孫供埋佢），全因為第三者瘋狂炒樓帶旺樓市，我真係多L謝，但我都忍。講唔完了，要數第三者嘅惡行惡相，恐怕數到我從捷克翻香港。
今日，第三者已經不再偷偷摸摸咁介入，而係㩒我屋企門鐘，我無開，直接拎鎖匙入黎再踢我房門。我嚇一跳抬頭問：「你邊位啊，憑咩闖入我屋企？」你話：「我係你老母，我鐘意幾時入自己屋企就幾時入，趕埋你走都仲得。我要你跳樓死，你去燒炭都唔得。」劇情咁反轉，原來依個第三者係一個聲稱我阿媽嘅人，「阿媽」唔抵得我好，所以離間我同香港嘅關係係佢職責。
我無辦法再忍受依個第三者，佢已經唔單純係生活嘅折磨，而係令我無時無刻陷入生命危險。事隔五年，我再嚟一鑊大反擊，想話你知，就算我幾愛你，都唔係一個逆來順受嘅情人。
然後你猶如比第三者落左降頭咁話：「遊行人數雖然好多，但逃犯條例將如期恢復二讀辯論」，放心，你嘅司法朋友一定可以保護我咁話喎。
但你好似忘記咗一件事，你個第三者係我「阿媽」嚟架，我諗我熟佢多過你，佢兇殘成性嘅模樣，我無忘記過。
其實我唔知道我同你之間到底係咪愛情，因為爸爸話我知，愛係彼此雙方都有嘅情感。而依家已經變左單方面。
咁，我仲應唔應該愛落去，我仲可以點樣奪回香港嘅愛啊。
這是一個我和香港中間出現第三者的愛情故事。
一個好唔浪漫的故事。
#旅包在香港 #我愛香港 #香港加油
Search